Rattibha

مساء الخير، إن شاء الله خلال هالإسبوعين بسوي ثريدات عن الكلينكال بايو كمستري، ثقيل دم للأمانة لكِن نذاكره مع بعض ونفهمه عشان يصير حلو غصب 😂❤️

أول ثريد نبتدي فيه السلسلة بتكلم فِيه عن blood gases
بِنعرف مع بعض عن:
📍شنو فايدة تحليل غازات الدم؟
📍نوع العينة اللي بنحتاجها
📍ايش اللي قاعد يصير في الجِسم عشان يحافظ على غازات الدم في النورمال رينج
📍 وطبَعاً أهم شيء بِالنسبة لنا شلون بنقرأ نتايج غازات الدم

تحليل غازات الدم نستفيد مِنه جِداً عشان نشوف اذا الجسم والرئة تحديداً سليمه ولالا عن طريق إن احنا بنقيس عدة أشياء مِنها: PH, O2 , Co2
وبعض الأحيان يستخدمونه كَ follow up للمرضى
وعشان أشوف acid-base imbalance في الجِسم

العينة اللي بنحتاجها عينة دم بس مابنسحب من الوريد بنسحبها من الشرايين تكون أدق أكثر

قبل مانكمل للنقاط الثانية خلينا نفهم إيش يعني Acid-base balance
فيه عندنا الPH للجسم لازم يكون ثابت مايعلى ولاينزل، أدنى تغير ممكن يأثر على عمل الإنزيمات في الجسم ويسبب أضرار كثيرة

فَ عندنا PH, Pco2,Hco3 نحتاجهم يكونون في النورمال رينج وفي الصورة موجود النورمال رينج لِهم

انزين اذا صار فِيه خلل في الجِسم وصار فيه ارتفاع او انخفاض في PH هل الجسم بيكتف يده ويجلس يطالع بس؟ طبعاً لا تدرون إن الجسم داايماً مُبهر ويحاول يدافع عنا بشتى الطرق 😍

فِيه ثلاث طرق الجِسم بيدافع فِيها عن زيادة او انخفاض PH:
1- buffer system
2- Lungs
3- kidney
بتكلم وبفصل عَن الرئتين والكلى ..

زي ما احنا عارفين إن الرئتين مسؤولة عن التنفس بِحيث مع الهواء بندخل اوكسجين وبنطلع ثاني اكسيد الكربون
لِكن فيه بعض الأحيان تكون فيه مشاكل في الرئة بحيث عَملية التنفس ماتكون مضبوطة وبالتالي بيؤدي إلى خلل يا اما ارتفاع او انخفاض في ثاني اكسيد الكربون

طيب نشوف هالمعادلة واللي تصير طبيعياً في الجِسم
إن ثاني اكسيد الكربون يرتبط مع الماي الموجود في الجسم ويتحول إلى حمض الكربونيك وبعدها يتفكك إلى هيدروجين " حمض " وبيكربونات " قاعدي"

لو كان فِيه زياده عندي في ثاني اكسيد الكربون راح تتجه المعادلة لليمين بحيث ان البيكربونات بيزيد شوي بس اما الهيدروجين راح يرتفع أكثر وبِما انه حمضي بيسوي لي acidosis واحنا قلنا ان المشكلة في الرئة اصلاً
فَ بيصير respiratory acidosis

طيب الحين صار فيه عندي خلل في الجسم شنو ممكن يسوي عشان يدافع عن نفسه؟
هِنا بتجي الكِلية بتحاول تصحح الوضع بِما انها مسؤوله عن البيكربونات
بتحاول تمنع خروج البيكربونات " لانها قاعدية " وترتفع البيكربونات عشان تصحح الوضع

طيب ولو كان إن الرئة تعمل بشكل كبير مثل لما يكون شخص عنده حُمى، او متوتر ..راح تعمل بشكل أكبر وبعدها بتطلع ثاني اكسيد الكربون بِكمية أكبر من الطبيعي وبِما ان ثاني اكسيد الكربون حامضي فَ لما يقل بيصير عندي alkalosis

وطبعاً اذا قل ثاني اكسيد الكربون بتقل صديقتها معاها " الهيدروجين "
شنو بتسوي الكلى الحين؟ بتحاول تتخلص من البيكربونات أكثر بحيث ان الهيدروجين يزيد ويتصحح الوضع

طيب الحين لو كانت الرئتين سليمة بس المشكلة في الكلى
قلنا ان البيكربونات قاعدي فَ لما يصير خلل في الكلى بحيث تزيد تركيز البيكربونات بيصير metabolic alkalosis
وفيه بعض الأحيان يكون خلل غير في الكلى بحيث انها ماتقدر تركب البيكربونات وراح يقل وهالشيء بيسبب metabolic acidosis

طيب نجي لِ شلون نقرأ النتايج؟
📍نقاط مهمه عشان نعرف نقرأ النتايج :
•اول شيء لازم نعرف القيم الطبيعية.
•ثاني نقطة ضروري نعرفها إن PH صديق البيكربونات ولكن يكره ثاني اكسيد الكربون يعني راح يكون متناسب طردياً مع البيكربونات وعكس ثاني اكسيد الكربون

• أول شيء عيونا تطيح على PH عشان لو كان مرتفع بقول alkalosis ولو منخفض بقول acidosis
•بعدها انا ابي احدد هل هو respiratory ولا metabolic
•اذا ابي اشوف المشكلة من الرئتين بروح اطالع على ثاني اكسيد الكربون " حمض " لو كان مرتفع يعني acidosis ولو كان منخفض يعني alkalosis

واذا ابي اشيك على الكلى بشوف البيكربونات " قاعدي" لو كان مرتفع يعني alkalosis ولو منخفض يعني acidosis

طيب شلون بفرق بِما انه الجسم قاعد يعوض عن الخلل ويصير compensating شلون بعرف؟
زي ماقلت فوق ان Ph صديق البيكربونات ولكن يكره ثاني اكسيد الكربون
فَ اذا كان عندي مثلاً Ph والبيكربونات مرتفعيين وبعد ثاني اكسيد الكربون مرتفع

انا هنا بعرف ان المشكلة في الكلى وثاني اكسيد الكربون ارتفع بعدين عشان يصحح الوضع
ولو كان مثلاً ان PH نازل وثاني اكسيد الكربون مرتفع والبيكربونات مرتفعة بعرف ان بما ان PH وثاني اكسيد الكربون واحد نازل والثاني مرتفع يعني الخلل في الرئتين والبيكربونات ارتفعت عشان تصحح الوضع

طيب خلينا نحل cases عشان نفهم أكثر
أول حالة عِندنا ان Ph منخفض وثاني اكسيد الكربون مرتفع، هِنا على طول بس اشوف Ph نازل بقول acidosis وبِما انه ثاني اكسيد الكربون مرتفع يعني الخلل في الرئتين فَ يصير respiratory acidosis

وطبعاً بيصير تصحيح عن طريق الكلى بِإنها تزيد تركيز البيكربونات فَ بيصير عالي

الحالة الثانيه عندي Ph عالي يعني alkalosis وثاني اكسيد الكربون نازل يعني الخلل في الرئتين يعني respiratory alkalosis
الكلى بتصحح الوضع عن طريق انها بتنقص البيكربونات فَ بيكون نازل